上星期聽左一個電台節目（三個主持的，節目名有包含一種水果的）
佢地談論到香港人嘅遲到問題，
聽完後發覺：原來自己真係一個普通不過的香港人。
因為三個主持人所講嘅野，基本上小弟全部中晒，
包括遲到原因，藉口，心態之類嘅野。
不過最搞笑都係啲聽眾打電話上黎分享佢地聽過／見過人地用嘅遲到藉口，
無厘頭排名不分先後，包括：
1.地鐵塞車
2.困Lift (但嗰個人由屋企到返到學校嗰段路完全唔使搭Lift
3.上天安排
聽到「上天安排」呢個真係笑左我好耐，但又不得不佩服嗰位人兄嘅急才！
但係近日我聽到一個更加正嘅理由，
由小弟嘅同學，劉X賢（17歲）提供。
話說小弟星期四去中環大會堂出席左佛聯會聯校畢業典禮，
點名之際卻發覺劉同學未黎喎，
於是有同學就用高科技無線遙距通訊器（簡稱手提電話）通知佢從速趕到會場，
因為無故缺席將會有紀律處分（唔係扣兩分，係扣三分）
之後佢終於趕到，Ms Yan（小弟之班主任）亦同佢傾下偈，訓下話咁。
問及點解遲到嗰時，劉同學俾左個好好嘅理由，
佢話：「乜唔係可以遲到嘅咩？」
真係冇返咁上下勇氣都講唔出口，竟然講成遲到係理所當然咁！
其實好多香港人都唔會好守時，
你睇成日約人出街，去玩之類，總有一，兩個遲到就知咩事啦！
同埋點解我聽完個節目之後會覺得自己係一個普通不過嘅香港人呢？
因為香港人總係會為遲到搵藉口，唔會老老實實承認自己過失，
為呢種令其他人白白浪費時間等人嘅過失而道歉嘅人更加係絕種／受保護動物，
當然小弟都唔例外，不過諗真啲，
其實Say句Sorry咪仲好，至少唔使用腦諗埋晒啲咩上天安排嘅藉口！
節目又提到，當你明知已經遲到，又有人打俾你問你幾時到嗰時，
你總唔會講真實數字出黎，
例如你明明要15分鐘先到，你就話3分鐘內（報細數），又或者半個鐘（報大數）
小弟係報大數嗰類人，
因為人地預左等你半個鍾，你三個字就到，
起碼會令人有「你早到左」呢種錯覺。
揀報細數嘅人，你嘅原因又係咩呢我就不得而知喇！
其實守時係一種美德，做人呢就唔應該遲到嘅，
好似日本人咁，有調查顯示日本大部份人如果有約，
平均會早到10~15分鐘，
點解我地香港人唔可以做到呢樣野呢？
