先講講咩係儀容服飾檢查，
顧名思義，即係定期Check你嘅儀容，同校服有冇問題。
而特別在邊度呢？
唔係佢個標準有問題，
標準都只係好「普通」嘅男生唔俾染，燙，電髮，髮陰唔俾過眼眉，「的水」唔俾過半耳，髮尾唔俾掂恤衫領，唔俾gel頭，唔俾著船襪，一定要帶黑色皮帶，攝衫要攝到見到皮帶。
不過不幸地，除左船襪同帶皮帶之外，其他全部我都衰晒。

但係咁喎，又唔可以因為咁話我係壞學生，
先講頭髮，其實頭髮長少少，我覺得對個儀容冇乜影響喎！
如果我冇記錯，學校解釋係話驚影響視線，咁側面「的水」同髮尾唔會喇呱！
你睇人地保一啲會考30分嘅同學咪又係唔符合標準！
其實我最憎都係學校對頭髮要求咁鬼嚴姐，
頭髮咁短真係好鬼樣衰架嘛！

嚴都唔緊要，畢竟我呢間學校一直都係以「校風純樸」為「賣點」，
（唔係點引到啲家長送仔女入黎讀）
問題係衣家竟然差唔多一個月Check一次，
真係痴線！一個唔好彩要一個月剪一次頭髮，
大佬呀！Red Hiar 剪一次$68架，你幫我出吖！

我諗，學校都會想學生係呢間學校過得開心嘅，
如果係咁，就至少唔應該捉人捉得咁鬼嚴先啦！
因為一日有儀檢呢一回事，我地一日都唔會點快樂呀！